Оросын арми 6 сарын 2-ны шөнө Киевт дрон, далавчит пуужингаар цохилт өгсөн байна. Энэ тухай Киев хотын цэргийн захиргаа мэдээлжээ. Агаарын довтолгооноос хамгаалах систем бүх нисгэгчгүй онгоц, пуужингуудыг устгасан гэж Украины эрх баригчид мэдэгдсэн байна.
Киевт өмнөх өдөр буюу 6 сарын 1-нд шилжих шөнө пуужингийн цохилт өгсний улмаас 3 хүн нас барсны 1 нь хүүхэд байна.
Урьдчилсан мэдээллээр Киевийн дээгүүр болон Киев орчмын агаарын орон зайд агаарын довтолгооноос хамгаалах хүчин 30 гаруй агаарын байг илрүүлж устгасан байна. Хохирол болон хүний амь нас хохирсон талаар мэдээлэл алга байна.
Киев хотын дарга Виталий Кличко хэлэхдээ, Дарницкий дүүргийн зам дээрээс шатаж буй пуужингийн хэлтэрхийнүүд олдож, Подольский дүүрэгт пуужингийн хэлтэрхий унасны улмаас хиймэл зүлэг шатсан байна. Түүний хэлснээр, агаарын дайралтын дараа Киевт аврах алба, түргэн тусламжийн ямар нэг дуудлага ирээгүй байна. Украины Зэвсэгт хүчний урьдчилсан мэдээгээр, шөнийн цагаар Оросын арми 15 далавчит пуужин, Ираны 18 Шахед нисгэгчгүй онгоц харвасан байна. "Энэ бүх агаарын байг манай хамгаалагчид устгасан. Мэдээллийг тодруулж байна" гэж өглөөний мэдээнд дурджээ.
Армийнхны мэдээлснээр, өнгөрсөн нэг өдрийн дотор Орос Киев рүү 12 пуужингийн цохилт өгсний 10 нь “Искандер” баллистик болон далавчит пуужин байна. Тэдгээрийг агаарын довтолгооноос хамгаалах системээр болон хоёр С-300 зенитийн пуужин ашиглан харваж устгасан байна. Түүнчлэн Оросын арми Украины цэргүүд болон суурин газруудын байрлалд 46 удаа агаарын цохилт өгч, 107 удаа олон тооны пуужин харвах системээр дайралт хийсэн байна. "Харамсалтай нь энгийн иргэд, тэр дундаа хүүхдүүд амь үрэгдэж, шархадсан ба хүүхдийн эмнэлэг, орон сууцны барилгууд, хувийн байшингууд болон иргэний бусад дэд бүтэц эвдэрч сүйрсэн байна" гэж тайланд дурджээ.
Эх сурвалж: Настоящее время
