Азийн Наадамд оролцож буй Монголын сагсан бөмбөгийн шигшээ баг “B” хэсэгт талбайн эзэн БНХАУ, Хятадын Тайпэй болон Хонконг Хятадын багтай өрсөлдөх билээ.
Уг нь Ливаны баг энэ хэсэгт багтсан ч олон тоглогч нь гэмтэлтэй байгаа тул эцсийн мөчид нэрээ татсан юм. Тус багийн оронд Хонконгийн шигшээ оролцохоор болсон билээ.
Манай залуус нээлтийн тоглолтоо БНХАУ-ын эсрэг хийж, 50:89-өөр дийлдлээ. Талбайн эздээс Кевин Жан 19 оноо авч, бусад тоглогчдоо манлайлсан бол манай талаас О.Тулга 8 оноо авчээ.
Монголын шигшээ хэсгийн дараагийн тоглолтоо Хонконгийн эсрэг энэ сарын 28-нд тоглоно. Улмаар 30-нд Хятадын Тайпэйтай өрсөлдөх юм. Дашрамд, хэсэг тус бүрээ тэргүүлсэн дөрвөн баг шөвгийн 8-д үлдэх эрхээ шууд авах бол үлдсэн дөрвөн эрхийн төлөө найман баг нэмэлт тоглолт хийх билээ.
Гэрэл зургийг: Э.Харцага
Монголын спортын сэтгүүлчдийн холбоо
