Хаврын улиралд идээ ундаа, явдал мөрийг хэрхэн тохируулан сонгож хэрэглэх вэ?
Энэ үед хүйтэн байсан өвлийн эх адагт дотроо хурж байсан ходоодны ерөнхий галын илч суларсанаас шингээх чадвар буурдаг бөгөөд цаг агаар хуурайшин, салхи босон дулаарахын хамт хүний биеийн дотоод дулаан болох шар босч ирдэг.
Иймд өвөл дуусан цагаан идээнд шилжих завсрын энэ үед "үүц" махаа задлаж хааяа яргуй идсэн ямааны махаар хоол хийн иддэг ба шар тос, цагаан тос, өөх тослог зүйл өрөм, хайлмаг, ээзгий, бяслаг, зөөхий, ааруул зэрэг цагаан идээг цайндаа хийн гэсгээн идэх зэрэг нь ходоодны галын илчийг сэлбэж, илчийг үүсгэдэг тул хаврын хавсрага, салхи жаврыг давахад тустай тул голлон хэрэглэнэ.
Мөн аарцтай шөл, шар тостой арвайн гурил, хуучин арвайн гурил, хөх гурилын төрлийн хоол, боов боорцог, хонь үхрийн махтай гурилтай шөл, сармистай бууз, банш, хуушуур, шар тосонд гурилдсан цай, буцалсан ус, зөгийн балтай ус ууж, шим төгөлдөр цагаан идээ, будаа зэрэг бор хоол халуунаар нь хоолловол сайн.
Эх сурвалж: Эрүүл мэндийн яам, Нийгмийн Эрүүл мэндийн Үндэсний төв
