Эрүүл мэндийн байгууллагаар үйлчлүүлэхэд даатгалын цэнхэр дэвтрээ заавал биедээ авч явах шаардлагагүй болжээ. Тодруулбал Эрүүл мэндийн даатгалын цахим системд эрүүл мэндийн даатгалын санг бүрдүүлж буй даатгал төлөгчдийн шимтгэлийн мэдээллийг бүрдүүлдэг болжээ. Ингэснээр эрүүл мэндийн байгууллагууд иргэдээс заавал цэнхэр дэвтрийг шаардахгүй гэсэн үг юм.
Тухайн иргэний регистерийн дугаараар эрүүл мэндийн даатгалын шимтгэл төлсөн, эсвэл төлөөгүй зэрэг бүх мэдээллүүд цахим системд гарч ирнэ. Энэ мэдээллийг ЭМД-ын ерөнхий газар 2019 оны нэгдүгээр сараас эхлэн эрүүл мэндийн даатгалын гэрээ бүхий эрүүл мэндийн тусламж, үйлчилгээ үзүүлэх байгууллагуудад чиглэл хүргүүлжээ.
Харин эрүүл мэндийн даатгалын шимтгэлээ төлөөгүй иргэн эрүүл мэндийн даатгалын сангаас зардлын төлбөрийг хариуцах, аливаа тусламж үйлчилгээг авах боломжгүй. Иймээс иргэд эрүүл мэндийн даатгалд хамрагдахын тулд тухайн оны төлөөгүй шимтгэлээ хөдөлмөрийн хөлсний доод хэмжээний тодорхой хувиар тооцож төлнө. 2019 онд хөдөлмөрийн хөлсний доод хэмжээ 320 мянган төгрөг болсон бөгөөд даатгуулагч эрүүл мэндийн даатгалд сард 3200, жилд 38400 төгрөг төлөх юм байна.
Гэхдээ зарим тохиолдолд, хувиараа даатгуулагч 2019 оны эрүүл мэндийн даатгалын шимтгэлээ төллөө гэхэд орлогыг нь төвлөрүүлж байгаа ажилтнууд ногдлын үүсвэрийг нь үүсгээгүй байвал цахим системд 2019 оны даатгалын төлөлт харагдахгүй гэсэн үг. Тиймээс эрүүл мэндийн даатгалын дэвтрээ үзүүлэх боломжтой тул цэнхэр дэвтэр ашиглалтаас бүрмөсөн гарахгүй юм байна. Цахим бүртгэлийн лавлагаанаас таны орлогын баримт харагдаж байвал иргэн эрүүл мэндийн байгууллагаар үйлчлүүлэх эрх нь нээлттэй.
