Монголд дүрслэх урлагийн мэргэжлийн байгууллага үүсэн байгуулагдсаны түүхт 80 жил, “Монгол зураг” нийгэмлэгийн 20 жилийн ойд зориулж Монгол зургийн шилдэг бүтээлийн “BEST OF MONGOL ZURAG” үзэсгэлэн нээлтээ хийлээ.
Монгол зургийн сор бүтээлийг гадаад дотоодын үзэгч түмэнд сорчлон үзүүлэх энэхүү үзэсгэлэн нь Монголын уран зургийн галерейн алтан сан хөмрөг, Монголын урчуудын эвлэлийн сан хөмрөг, Дүрслэх урлагийн музейн сан хөмрөг, Монголын нэр хүндтэй цуглуулагч, уран бүтээлчдийн бүтээлүүдээс сорчлон 120 бүтээлийг хамтад нь анх удаа дэлгэжээ.
